Buuten

En zeggen da ‘k gèrn no ’t Cactusfestival woaren gewist. Mo ‘k en kosten nie. Zuuster, ‘k en mochten nie. Eeën van de dochters en eur vint woaren van Gent gekommen vo der notoe te goan. Nie da ze beschaamd woaren vo mè mien gezieën te zien, mo wieën most er vor under kleeëne gasten zorgen? Biebie!

Dodeure moste ‘k thuus bluuven. Mor allee, ‘t was bie ons in de nof ook ’n meziekfestival … mè kienderliedjies. En snavens, on ze mosten gon slapen, was de slotact ’n blètconcèr. Besluut: m’ èn ons gamuuzird!

M’n gebur eejt èm overtied minder gamuuzird. Dendieënen was van zinne vo den eeësten zuulie no den Taptoe ip de Burg te goan. J’ is nie gewist. Omdat je der gin piente koste kriegen, zeejd ie. Oedadde, vroege ‘k. Da ’t ip d’ affiesse stoend, antworddet ie: Tap toe!

‘k Zeggen ‘t, ’n mens kan em vergissen. Dat is – nu da ’t reissezoeën vulip bezig – met ip reejze goan ook azzo. Lik dien Ollander die no Riesel in Vrankriek wilde goan. Je voeërde ip z’n GPS ‘Lille’ in. Je kwaam toch wal terechte in ’t dorp Lille in de Kempen.

Da doe mien de vrage stallen os j’ in ’t binnenland ook in ’t buutenland kan zien. ‘k En ’t nie over ’t feejt da j’ in de zomer in Brugge deur ol die toeriesten met under vrimde toalen zoe kannen peejzen da j’ in ’t buutenland ziet. Mo joaje, ook in ’t binnenland kan je no ‘t buutenland. In Kleen Brabant, tusschen Temse en Bornem ligt er dorptjie Buitenland.

Nu da ’t musselsezoeën begost is, wille ‘k je vo wat anders woarschuwen,. Vor ’n uutstaptjie t’ arranzeren vo mussels te gon eten in Philippine (in Olland), zoe je beter nie nor ’n reisbureau goan. Je kriegt er gegarandird ’n brosjeure van Azië.