“Kè moeite moetn doen om tottende te kiekn.” Da zei de gouverneur, moandag ip de raddio ovre Tgodlik Monstre. De serie ip Jin is djièste nasjonaal uutgezond’n serie in tWest-Vlaoms. Ook al èn – surtout West-Vloamse – teg’nstanders doar na djièste uutzendinge serieuze bedenking’n bie. Magda Devos, die wriè gekend is as dialectologe: “Daddis een serieuze mislukkinge. Twest-Vlaoams in Tgodlik Monstre: godlik of monstrachtig?
Woar datovre goat: sedert zundag kunje ip Jin kiek’n noar Tgodlik Monstre, een bewerkinge voer tilleviesje van Tom Lanoyes ferm bebofte ‘Monstretrilogie’. Je vertelt ovre een famildje mid’nstanders uutzud’n van de provinsje. Om datttollemolle nog echtre zoe zin, sprikt iedrièn West-Vloams. Moar pas ip: giènjèn van dedé die meespel’n is nen West-Vloaming. Moar zèn tgevond’n om doar ‘n mouwe an te pass’n: nen dialectmjèstre. En azwo lièrden Michel Van Dousselaere, Gilde De Bal en Andre Iancka Fleerackers ‘tZuud-West-Vloams an. Passeerde zundag zoag’n we ton wuk dasse gelièrd èn. Ge ziet vanier datter daor ferm zoed’ovre geklapt wèrd’n. Ip de raddio vroeg’n ze zelfs de gouverneur om zin gedacht. Stief skone vontie ‘tnie.
“Mjèr bezig met de toale dan met de vertellinge”
Magda Devos is van ‘tzelfde gedacht. “‘t Ambeteerde mi zwo stief,” zeizezie,”dak mjèr bezig wos met de toale dan met de vertellinge.” Magda Devos wos tot 1 oktoobre van passeer djaore doctor in de Nederlandse Taalkunde aan nuniv van Hent. Moar ook achtreur pensjoen blief ze eur bezig oed’n met de toale. Surtout met ‘t Woordenboek van de Vlaamse Dialecten, ‘n affaire dat ol bezig is van in djaoren tzeventig en da nu zin ende noadert. Zis zie van Klemkerke bie Den Oane, moar ge vindt gièn dialect ofse kennet. Uutgezonderd ‘t gièn dasse zundag oirde ip den tilleviesje.
“Daddenwas gièen Wesvlams”
“Een wriè mislukkinge”, zegsezie. ,,Daddenwos gièn Westvlams. Dawos een soirte ‘skoon Nederlands’, zelfs een bitje Broabants da klonk lik Wesvlams. Bennekik een dialectologe en vaneigens da kik iedre misse woire. Kè zundag tus gekek’n, thope mè min moedre en we woaren ollemaole takkoird: ‘t Wesvlams in Tgoddelik Monstre klonk artifisjeel. Kwetekik nie vur wukke kiekers dadde nu entwodde extra geeft: dedè van buten West-Vloandren lez’n dondertitels en de West-Vloamingn voel’n uldre verskrikkelik gambeteerd.”
“Onglukkige keuze”
“Ge meugt zegg’n wuk daje wilt, twos een onglukkige keuze,” zegt Magda Devos. “Ze gebruk’n Wesvlams da nie bestoat, da gièn toaltje nis en datter niemand sprikt. Khè zelfs flagrante fout’n gevond’n.” Lik wadde? ” Met ipzet: dadde bestoat nie in tWesvlams. Wiedre zegg’n: èspres. Ze smiet’n olles ip nhoopke. ‘Zieje daar nog’ Da wordt ‘ziej dao nog’. Ge moet de skuld vor ol die missen nie gaon zoek’n bie dacteurs, zegt Magda Devos nog. “Khè kompasje mè die mens’n. Die Gudrun: mien tjièn’n kruld’n oek se woirde klapp’n. Of da mens da Gilda De Bal speelt: chanse dasse nie vele moe zegg’n. Moar hoe kunn’n die mensen nu goe spel’n oesse een toale moet’n sprek’n dasse nie kenn’n? Wie die toale wil kenn’n, moe ol tideke bie die mens’n weun’n.
Moar… dr. Devos goa toch bluven kiek’n. “Al vondekik die ièste afleveringe nie fameus. Maor de vertellinge sprikt mie wel an.”
(Jan Hèjzn, òòfd van de redaksje)
Mjir in de KW van vande weke
Televisie en radio
Fout opgemerkt of meer nieuws? Meld het hier