Der zien toch were zwoaneejers gestolen aan 't Stil Ende. Wa doeën ze dommee, zoe je j'n ofvragen. Awal, die dieëven leggen die eejers in 'n broeëmassiene en verkopen ton de kuikentjies die deruut zien gekommen, ip de zwarte markt.
...

Der zien toch were zwoaneejers gestolen aan 't Stil Ende. Wa doeën ze dommee, zoe je j'n ofvragen. Awal, die dieëven leggen die eejers in 'n broeëmassiene en verkopen ton de kuikentjies die deruut zien gekommen, ip de zwarte markt. Wieën doet er da nu? Awal, 't zoe bie manieëre van spreken m'n vrouwe kannen gewist hèn. 'k Zeggen wal: bie manieëre van spreken, van 't is zie nie (z' is dovóóren te brave). Me ze broeë zie ook soms e ki ip entwa 'n lank stil ende vo dorachter no d' omgevienge van de Mart te goan. Ze kan zie 'n gheeël lank stil ende gon stelen met heur ogen: ze lop ton roend van ittalaze nor ittalaze vo te gon kieken na de rokstjies, de bloezetjies, de kleeëtjies, de broeken, de vestjies... Meeëstol de zundagnuchtend. Aja, zeg ze, de wienkels zien ton toe en ton kan ze nie in de verleidienge graken. Van 't is mo vo te kieken. Mo derachter zit ze wal 'n bitjie meeër of 'n moand te broeën even lange of 'n zwoane toedat d' eejerschoale van heur verlangens (en mien portemannee) is gebosten. Mor angezieën da zezie zuuste lik de zwoanen ip meeër of eeën eej tegeliek zit te broeën, is de króóst van heur broeën vilvuldig. 'k Weten os 't zover is. Ze recht heur nekke en stikt heur kop omhoge lik 'n zwoane. Ze sloat 'n poar keeëren met heur oarms en stampt met heur voeëten lik 'n zwoane die go vlieëgen en z' is vertrokken. No de wienkels in stad. 't Gróót verschil tussen dendieën die an 't Stil Ende zwoaneejers hee gestolen, en mien vrouwe die 'n gheeël stil ende met heur ogen hee gestolen, is dat ie verkopt en zie kopt. Wieën zit er ton met 'n eej ip? Ikke! Hoevil hee da batjie nu were gekost?