VIDEO – Siessewat junior wijdt zijn column aan ‘k En Brugge in M’n Herte

© Davy Coghe
© Davy Coghe
Redactie KW

Elke week schrijft Mark Van De Voorde onder het pseudoniem Siessewat junior een column in het Brugs. Zijn ‘Brugsch Krabbels’ gaat deze week uiteraard over ‘k En Brugge In M’n Herte. Voor een keer leest hij die zelf voor. Bekijk of lees zijn cursiefje hier.

Hier staat ingevoegde content uit een social media netwerk dat cookies wil schrijven of uitlezen. U heeft hiervoor geen toestemming gegeven.
Klik hier om dit alsnog toe te laten

Herteklop

M’n gebur is no de doktur gewist. No de spissialiest van ’t herte. Da was nie normal, van je zeg olsan: “Ik hèn gin herte, ik hèn twi magen.” Da kan je zieën an z’n buuk: ost ie z’n huus verlat, is z’n buuk ’t eeëste da buutenkomt. ’n Dikken buuk is nie goeëd vo ’t herte. Mo ’t was nie dorom da m’n gebur z’n herte lieët oenderzoeken. ’t Was omda z’n vrouwe’ haâ gezeejd: “Ozze ‘k ik mien óóre ip j’n bost leggen, hóóre ‘k entwa ruuschen en j’n herteklop go wreeë luude in verschillende tóónen.”

Die uutsprake van z’n hertenagel sloeg an z’n herte. Je zoe van minder den herteklop kriegen. M’n gebur begost t’ hertefretten. Dat ie ’t nie an z’n herte wilde loaten kommen, zeejd ie en dorom lieët ie der gin gras over groeien en trok no de spissioliest.

Je deej z’n vertallement, of lieëver da van z’n vrouwe, an den doktur en lieët ook wal verstoan dat ie e bitjien oengerust was geworden. Vor e lank verhoal kort te maken, m’n gebur leej z’n herte blóót. “Da ruuschen”, zeej de spisioliest, “zoe kannen wiezen ip verstop’ oaders. Mo dien herteklop in verschillende tóónen, dor hè ‘k nog nóós van ghóórd… Of wacht e ki, toeët… Kom, me gon j’ oenderzoeken.”

Os ’t resultoat van de cardiogram uut de massiene kwaam, vroeg m’n gebur: “Is ’t erg…” Den doktur zette z’n bril ip ’t puntje van z’n neuze: “Je mag gerust zien. Da ruusschen is ’t woater van de Reitjes da j’ hóórt, dien herteklop in tóónen is den beioard. J’ e nieët an j’n herte, j’e Brugge in j’n herte. Je zie ’t twidde gevol. Feeërtig joar geleejn e ‘k ook zowwen kalant ghèd. Dendieën hee der e liedjien over geschreven: ‘k En Brugge in m’n Herte.”

Zeg et ne keer

Waar heb je een fout gezien of heb je zelf een suggestie? Laat het ons dan weten.

Hier staat ingevoegde content uit een social media netwerk dat cookies wil schrijven of uitlezen. U heeft hiervoor geen toestemming gegeven.
Klik hier om dit alsnog toe te laten